اخوتي الاعزاء بالمنتدى بهذا اليوم الحزين على بغداد والي سبب الالم لكل العراقيين حبيت انزل هذه القصيدة
واتمنى تعجبكم
(*( جرحنا واحد يا بغــداد )*)
بغــداد الحبيبــة ما تستاهــل كُـل الصــار بيهـــــــا
بـغــداد اليـــوم حتــى الصـخــر يـبچــي عليهـــــــا
شلـــون ول يمتــه الحـــزن يـبـقــى مخــاويهـــــــا
مو كافــي جـــروح أتملخــت يــا ربـــي داويهـــــــا
حــرام هــاي أم الدنـيــا هيچـــي يصـيــر تالـيهــــــا
الكــرخ صارت سجــن من كـل الجهــات مسيجيهــا
والـرصافـــة تصيـــح بصــوت تـريـد خييــر يحميهـــــا
صحيح أني بعيــد عنهـا بس البـال يمهـا مــا ناسيهـــا
وحاســس بجـرح الطيبــين الصابريـن و مصبريهــــــا
بغداد لو بيدي أضمهــا بگــلبي وبروحــي أحتويهــــــا
للأسف اليوم صارت مثل لوحــة بل مــزاد معلگيهـــــا
ويا حرامــي اليجي الــف مرة يبيــع بيها ويشتريهـــــا
بغـداد العـروس ياحيـف وحسافــة الحثالات مشوهيهـــا
گـبل الطيــور بسماها تلـعــب واليـوم الصخــام يعتليهــــا
دار الســلام جـان عنوانهــا والحُــب والأمــان ملـونيهــــا
اليوم بغــداد گدام العالــم مذلــولة مثل المسيــح صالبيهــا
أشهد يا تاريـــخ وأكتب مثـل بغــداد محـد يتحمل بلاويهـــا
أكتـب الحزن يكبـر والجرح ينـزف بس مـا يـگدر يطـويهــا
هــاي بغــداد الأمجاد والعــز والخير شامخـة شما يجيهـــا
بغـداد كلنـا ولــدچ أحنا وتدريــن شكــو بـأروحنــا عذريهـــا
الــف مرة أنمــوت من نشوف أيـد الغريب وحــدچ تلاويهــا
بغــداد وحگ الله كبــل ما تصيحين الأه أحنا الدمعة نبجيهــا
أحنا من نشــوف الــدم على گاعــچ نريد العــيــن نعميهــــا
جرحــچ جرحنــا يا بغــداد وبس لــرب العالميــن نشكيهـــا
هو طبيب الـروح وهو دوى الجـروح دخيـلك يـا ربي أشفيهــا
ترى تعبت هوايـا وأحنا هم تعبنا والغربـة بالمدابـچ نجاريهــا
الله لا ينطي الجان السبــب خلانــا بالدمــع و الأه نواسيهــا
ما أريــد أجيب طاري الصماغــات لأن كلهم غيرتهم بايعيهــا
عندي حچـايات تلوگلهم بس احتراماً لبغداد مـا راح أحچـيهــا
موضوع: (*( جرحنا واحد يا بغــداد )*) 
الأربعاء أغسطس 19, 2009 11:13 pm
